Технолошки гледано радиотерапијата е дисциплина со најголем подем во последните години. Благодарение на модерните техники на зрачење и најсовремените технолошки апарати добиени се успешни резултати во лекувањето на канцерозното ткиво.

Кај пациентите со примарни и секундарни тумори на `рбетниот столб и `рбетен мозок радиотерапијата се применува најчесто пред и по оперативната интервенција со цел да се добијат посакуваните резултати во третманот на пациентот.

Што е радиотерапија?

Радиотерапијата е дефинирана како лекување на канцерозно ткиво или на некои немалигни тумори со помош на зрачење. Во јавноста е позната како радиолошка терапија или терапија со јонизирачки зраци. Зраците користени во радиотерапијата имаат цел да го спречат растењето на канцерозните клетки или да ги уништат истите. По дијагностицирање на канцер, 60-80 проценти од пациентите со канцер имаат потреба од радиотерапија. Пациентите кои се изложени на оваа терапија се безбедни за околината и можат да продолжат со нормални секојдневни активности.

Како се одредува методот на лекување?

Повеќе фактори влијаат на одредувањето на третман (хируршки, радиотерапија или хемотерапија). Главните фактори се: хистолошкиот тип на туморот, стадиумот, локализацијата на малигното заболување, како и возраста на пациентот и неговата општасостојба. Одлуките за третманот се донесуваат по процена од страна на лекари од разни области и секој пациент се оценува посебно.

Како влијае радиотерапијата врз пациентот?

Радиотерапијата претставува локален третман и е неинванзивна метода на лекување. Високата доза на зрачење применета во текот на сесиите со радиотерапија ги уништува клетките или го спречува нивното размножување. Бидејќи клетките на туморот се делат побргу од нормалните, радиотерапијата ги уништува повеќето од овие клетки. Иако и нормалните клетки се под дејство на зрачење, може да заздрават во краток временски период како резултат на нивната помала осетливост и посебни механизми на регенерација, кои не се својствени за канцерозните клетки. Од друга страна, бројот на нормални клетки што го опкружуваат третираниот регион е милион пати поголем од бројот на канцерозни клетки. За да се заштитат нормалните клетки, вкупната доза на зрачење е поделена во помали дози кои се даваат дневно во специфичен временски период. Освен тоа, лекарите вложуваат напор да го заштитат здравото ткиво и да го насочат зрачењето кон заболениот регион.

Клиничката болница „Аџибадем Систина“ располага со моќниот TRILOGY апарат за радиотерапија

Во Клиничката болница „Аџибадем Систина“, радиотерапијата се применува со најсовремениот апарат TRILOGY кој овозможува брз и ефикасен третман на туморот. TRILOGY апаратот овозможува високата доза на зрачење да биде целосно насочена кон целниот тумор, со што се заштитени околните здрави ткива и органи. Намалувањето на дозата во здравите ткива и органи е значајно за заштита на нивната функција и одржувањето на квалитетот на живот по завршување на радиотерапискиот третман. 

Хемотерапијата има за цел да ги уништи канцерогените клетки кои растат неконтролирано поради некои промени во своите структури. Во повеќето случаи целта е да се убијат канцерогените клетки лоцирани во `рбетниот столб или `рбетниот мозок со препишување на неколку лекови кои делуваат преку разни механизми. Хемотерапија се применува пред оперативниот и по оперативниот период со цел да се постигнат најдобрите резултати во третманот на пациентите.

Кај примарните и секундарни (метастатски) тумори на `рбетот и `рбетниот мозок хемотерапијата се употребува во зависност од хистолошкиот тип на туморот, возраста и здравствената состојба на пациентот. Доколку станува збор за метастази, од големо значење е видот на туморот и делот на телото од каде што потекнува. Во случај кога постојат метастази на `рбетниот столб, се препишува и бисфосфонатска терапија.

Вертебропластика претставува минимално инванзивна и исклучително ефикасна хируршка метода која се изведува кога имаме патолошка промена или фрактура на прешлен (компресивна остеопоротска фрактура, примарен бенигнен или малигнен тумор, секундарен депозит - метастаза). Целта на оваа интервенција е стабилизација или зајакнување на променетиот прешлен, како и брзо и најчесто комплетно обезболување. Веднаш по интервенцијата пациентите се мобилизираат, со  можност да ја напуштат болницата уште истиот ден. Процедурата е перкутана без хируршки рез.

Кај сите видови хируршки интервенции се користи неврофизиолошки мониторинг со што се овозможува прецизна локализација на нервите, нервните патишта и јадра во `рбетниот мозок. Благодарение на овој софистициран мониторинг, хирурзите имаат прецизна слика на `рбетниот мозок со што шансите за повреда на нервите и останатите структури се сведени на минимум.